Mnr. Phillip Bothma (Middelburg/LimPuma Herpetologiese Vereniging) het dié giftige slang in Lebombostraat (Aerorand) gaan vang. Victor Boshoff (voorsitter Middelburg/LimPuma) sê hulle was verstom toe die mense ’n foto stuur en dit ook self geïdentifiseer het as ’n giftige Takslang.

“Daardie slang kom glad nie in Middelburg voor nie. Iemand het hom óf onwettig aangehou en hy het uitgekom, óf hy het in ’n voertuig vanaf Limpopo of Natal af ’n rygeleentheid gekry.”

Victor sê dat daar géén teëgif is vir die slang nie.

“Sy gif is hemotoksies, wat beteken dat hy jou liggaam se bloedstollingsmeganisme aanval en jy jou kan doodbloei. Pasiënte wat deur ’n takslang gepik word, moet ’n bloedoortapping kry.”

Hy meld dat die slang gesond is en dat daar klaar vir hom ’n mikroskyfie ingesit is.

Die Herpetologiese Vereniging sal hom gaan loslaat in ’n area waar hy natuurlik voorkom.