Me. Madie Gomes Adao (hoof) sê die booswig het tydens ’n kragonderbreking ingebreek. “Ons het nie batterye vir ons kamerastelsel nie.”

Die palissadeheining is onder oopgebreek, om toegang tot die perseel te kry.
Daarna is klasse se slotte oopgebreek.

By die Graad R-klas is die grootste skade aangerig. Al die DVD’s met musiek en kinderstories daarop, asook die DVD-speler, is gesteel.

Die gordyne is afgeruk, waarna die inbreker na alle waarskynlikheid ál die opvoedkundige speelgoed van die kleuters daarin toegemaak het, want die gordyne is skoonveld.

’n Ander klas se diefwering is van buite af uitgehaal ’n hoëtroustel gesteel.

In die saal het die boef probeer om die gordyne van die reling af te ruk en die reling is gebuig. Die gordyne is gelukkig nie gesteel nie.
Me. Gomes Adao sê om alles te vervang en reg te maak, gaan duisende rande beloop.

• Persone wat dalk opvoedkundige speelgoed, DVD’s of ander artikels vir die Graad R klas wil skenk, of wil help met herstelwerk kan me. Gomes Adao bel by 082 806 6248.

• Die skool bedank die persoon wat reeds vir die skool ’n DVD-spelers geskenk het.