Volgens die burgerregte organisasie is daar twee taxi-verenigings wat tot dusver geïdentifiseer is wat aan die beplande protesoptogte sal deelneem.
Die EFF het ook intussen volgens Afriforum, hul steun aan landwye betogings uitgespreek.

Volgens mnr. Raymond Hohls van Afriforum is daar tans geen inligting oor beplande betogings in Mpumalanga bekend nie.

“Tans word boodskappe rondgestuur oor die betogings maar daar is geen aanduiding wie agter dié boodskappe sit nie,” sê mnr. Hohls.

Hy sê dat landsburgers minder geneig is om op Vrydae aan massabetogings deel te neem.
“Die opkoms op Vrydae is gewoonlik veel laer,” sê mnr. Hohls.

Die EFF self het nog geen inligting bekend gemaak oor hul beplande optredes nie.

“Ons beheerkamer sal daagliks nuwe inligting uitreik namate dit beskikbaar raak.”
Hy sê dat Afriforum-takke landwyd egter op volle paraatheid is.

“Lede sal deeglik op hoogte gehou word soos dinge ontvou, indien daar enigsins waarheid agter die oproep tot landwye stilstand is”.
Nietemin raai Afriforum veral inwoners van groter stede en metro’s om hul reisplanne Vrydag eerder uit te stel.

Afriforum opdaterings met nuwe inligting sal deurlopend vrygestel word en takbestuurders sal dadelik hiervan op hoogte gebring word.

Volgens die WhatsApp waarskuwings wat rondgestuur word, sal skoolkinders verhoed word om skole by te woon.
Plaaslike skole het egter nog nie kennisgewings uitgereik oor moontlike ontwrigtings weens die waarskuwings nie.

Die spook organiseerders van die optogte waarsku ook dat “vulstasies en besighede toegemaak sal word”.