Brandbestryders is met nat wasgoed buite ‘n brandende huis in Morkelstraat begroet.

Die brand is weens vinnige optrede deur die plaaslike brandweer tot die sitkamer en kombuis van die woning beperk.

Rook het die aandag van ‘n kind buite die huis getrek.

Die brandweer is ontbied en die ergste skade kon voorkom word, behalwe die reuk wat alles binnedring.

Volgens die eienaars het hulle vantevore twee vure in die binnebraai van die huis gemaak.

Die vure was egter reeds volgens die eienaars uitgebrand, en opdrag is gegee dat as uit die herd verwyder word voordat die tiener skielik rook sien uitborrel het by die dak.

Dis onduidelik of ‘n vonkie uit die herd, of kortsluiting, verantwoordelik was vir die vuur.

Naas die reuk staar die eienaars ook nou erge waterskade in die gesig.

Die plafon in die sitkamer is ook heeltemal uitgeruk sodat elke smeulende kooltjie bygekom kon word met die brandslang.