Mnr. Bernard van der Berg was op die Groblersdalpad op pad na Middelburg, toe hulle aan die onderpunt van Kranspoort moes stop, weens die trokongeluk waar die trok en die swael wat hy vervoer het, aan die brand geraak het.

Die trokdrywer is op die toneel oorlede.

“Die brandweer het my gevra om die mense op ’n veilige afstand te hou, aangesien die brandende swael uiters giftig is.”

Mnr. Van der Berg sê daar het ’n groep mans baie naby aan die toneel gestaan en hy het hulle ordentlik gevra om weg te staan.

“Die een man het aan my begin stamp en gevra wie ek dink ek is. Ek het vir hom probeer verduidelik dat die brandweer my gevra het om die mense op ’n veilige afstand te hou, weens die giftige gasse, maar hy was baie aggressief. Ek het die hele tyd kalm gebly.”

Mnr. Van der Berg sê ’n ander man het tussenbeide getree en vir die aggressor gesê hy moet hom uitlos, waarop hulle die aftog geblaas het.

“Ek glo dit gaan iewers op sosiale media uitkom, want daar was mense wat video’s van die gebeure geneem het.”

•Mnr. Van der Berg het goedgunstiglik die foto’s wat hy van die toneel geneem het, vir www.mobserver.co.za beskikbaar gestel.

’n Mens kan duidelik die blou vlammetjies op die teeroppervlak sien, wat ’n aanduiding is van swael wat brand.