Hulle kuier die laaste twee dae in ’n diep gat water in die Olifantsrivier op die Kromdraai grondpad uit (ou Middelburg/Witbankpad, naby eMalahleni).

Mnr. Freddy Rapatza, wat in die omgewing bly, sê hy het die seekoeie eergister omstreeks 17:00 gesien toe hulle kop uitgesteek het bokant die water.
Die volgende oggend het hy mense, wat water uit die watergat pomp, gewaarsku om versigtig te wees.

Www.mobserver.co.za het gistermiddag gaan kuier by mnr. Rapatza en hy het gewys waar hy hulle gesien het.
Hy het gister laatmiddag vir hulle uitgekyk, maar hulle nie weer gesien nie.

Vanoggend het hy hul spore langs die rivier gesien en besef dat hulle deur die loop van die nag weer by die watergat was.

•Mnr. Piet Wassenaar, wat ’n permit het van die Mpumalanga Toerisme en Parke en Agentskap (parkeraad) om probleemdiere te verwyder en te monitor, is in kennis gestel waar die seekoeie nou is.

Hy sê die seekoeie het die afgelope meer as twee maande heen en weer in die Olifantsrivier op beweeg en selfs sover as Hermansdal af gegaan.
Wat hom bekommer, is dat hulle al twee keer ook ’n draai in die Witbankdam gemaak het.

“Daar is oor drie weke ’n hengelkompetisie op die dam en mense kan met bote, kajakke en selfs met buitebande aan die kompetisie deelneem. Sou die seekoeie weer soontoe gaan, kan dit ’n groot gevaar inhou. Hengelaars met bote kan wegkom, maar ons is bekommerd oor dié op kajakke en buitebande.”

Hy is dankbaar dat daar tot op hede nog niemand beseer is deur die seekoeie nie.

“Toe hulle in ’n dam was in die Verena omgewing, het daar mense op die damwal gebly, maar die seekoeie het hulle nie gepla nie. Ons wil egter steeds mense waarsku dat die seekoeie veral in die nag uit die rivier klim en dan uiters gevaarlik is.”