‘n Sestigjarige werknemer van Mica, wat die een trok bestuur het wat die vullis opgelaai het, is uit ‘n trok uit geruk en met pepersproei in die gesig gespuit.

Daarna is die kantruit van die trok uitgeslaan, die windskerm erg beskadig en een van die wiele met ‘n skerp voorwerp stukkend gesteek.

Al die swartsakke met gemors wat die helpers reeds opgetel het, het die aanvallers van die trokke af geruk, stukkend geskeur en in die pad uitgegooi.

“Ek gaan dit nie hier los nie! Ek gaan regshulp inkry en ‘n paar sake open, waaronder aanranding, en opsetlike saakbeskadiging,” het ‘n omgekrapte mnr. Hugo de Witt (eienaar, Mica) kwaad uitgeroep.

‘n Groep inwoners het om 14:00 by Mica byeen gekom om die dorp te begin skoonmaak.

Almal se voertuie is by Mica gelos, waarna hulle in groepe ingedeel is om in Walter Sisulustraat te begin skoonmaak.

Drie trokke en ‘n laaigraaf het saambeweeg en kon die mense die sakke op die trokke gooi. Bottels en ander groot gemors is op die laaigraaf gegooi.

“Terwyl ons in die straat afbeweeg het, het mense ons gegroet en dankie gesê. Almal was so positief,” sê mnr. De Witt.

Na sowat twee ure se werk, het die drama by een van die klein groepies op die hoek van Walter Sisulu- en Bhimy Damanestraat begin.

‘n Voertuig, waarin vier mans was, het stadig verby gekom en ‘n bottel in die straat naby die skoonmakers gegooi.

Een van die persone wat skoongemaak het, het net rustig die bottel opgetel en aangegaan om skoon te maak.

Die volgende oomblik het ‘n groep van omtrent 20 opstokers op die groep toegesak.

“Van hulle het munisipale oorpakke aangehad, waarop die woorde: ‘Steve Tshwete Municipality’ agterop staan,” onthou mnr. Marius Pretorius (werknemer van Mica).

Die groep het ‘n graaf uit ‘n vrou se hande uit geruk en ook ‘n besem by die kind gegryp.

Tussendeur het die aanvallers die swartsakke van die trokke afgeruk en dit op die pad uitgegooi.

Mnr. Pretorius, wat gevrees het vir die trokdrywers se veiligheid, het dadelik vir hulle gesê om terug te draai Mica toe.

Die agterste trok kon weens verkeer nie vinnig genoeg omdraai nie en het die aanvallers op die trok en drywer toegesak.

Hulle het hom uitgepluk, met pepersproei gespuit en die trok beskadig.

“Hierdie skoonmaak-aksie was nie polities nie, almal het net lekker saamgewerk en was so opgewonde om iets vir hul dorp te doen. Hoekom moes ‘n handjievol mense dit nou kom sleg maak?” het mnr. De Witt moedeloos uitgevaar.