Me. Chantelle Kleinhans was met haar dogtertjie by die park langs die dam, “toe ons water toe is om te gaan kyk vir vissies”.
Groot was hul verbasing toe hulle nie vissies nie, maar ’n kissie kry.

Die gedenkkissie het ’n meter van die dam se oewer af in die water gedryf.

Die kissie en as, behoort aan mnr. Cornelius J. Kloppers.
Hy is op 13 Maart 1945 gebore, en op 19 Februarie 2014 oorlede, volgens die gedenkplaatjie.

Op die kissie staan ook “Rus in Vrede”, met geen ander inligting daarop nie.

Daar is ook geen aanduiding watter begrafnisondernemer die kissie uitgereik het nie.

Me. Kleinhans is die dam in waar sy die droeë gedenkkissie uit die water gehaal het.

“Hy was kurkdroog en het gedryf, daar het geen water uitgekom nie en ek vermoed die kissie is dieselfde dag nog in die dam geggooi,” sê me. Kleinhans.
Me. Kleinhans sê dat dit moontlik is dat die kissie kant toe gedryf het nadat dit ingegooi is.

“Wie doen so iets,” het sy kwaad opgemerk.

Sy het die kissie huistoe geneem waar sy dit steeds bewaar.

•Indien iemand weet wie is die oorledene of hoe die kissie in die water beland het, kan hulle Gerhard Rheeder bel by 013 2431434.