Hulle is na ’n wildsplaas in die Brits omgewing vervoer.

Mnr. Piet Wassenaar (wat ’n permit het van die Mpumalanga Toerisme en Parke Agentskap, om hulle te help met probleemdiere) het laat weet dat die seekoeie uiteindelik gevang is.

Die seekoeie was die afgelope tyd in mnr. Jumbo van der Merwe se plaasdam, op die Zaaihoekpad, buite eMalahleni.

Hulle was ’n ruk terug ook daar en toe hulle terugkeer, is ’n elektriese heining om die gebied aangebring.
Daarna is ’n boma gebou om hulle in te lok.

Mnr. Wassenaar sê hulle het verlede Donderdagaand ook gepoog om die twee te vang.

Die bul het mooi ingegaan, maar die koei was te naby aan die hek en hulle het weens veiligheidsredes besluit om die vangs later te doen.
Gisteraand het albei die seekoeie by die boma ingegaan.

Die diere is deur die Mpumalanga Toerisme en Parke Agentskap se veearts ’n kalmeermiddel toegedien, tydens die vangproses.

“Ons het hulle nie verdoof nie en die seekoeibul het op sy agterpote gestaan en na ons gehap. Gelukkig het alles goed verloop en nie mens of dier is beseer nie.”
Hy het verneem dat die seekoeie veilig by hul eindbestemming aangekom het.

*Mnr. Wassenaar wil elke persoon bedank wat hom die afgelope ses maande gekontak het met nuus waar die seekoeie hulle bevind.

Hy sê ook dankie aan almal wat in die tyd wat hulle in die dam afgesper is, vir drie weke bydraes gegee het vir kos.
Dit het daagliks meer as R500 beloop en hulle het uit alle oorde skenkings gekry.

’n Woord van dank gaan aan SG Coal wat ’n masjien beskikbaar gestel het sodat slote gegrou kon word vir die trokke en bomas tot by die dam.

Hy kan ook nie genoeg dankie sê vir die ongelooflike werk wat die MTPA gedoen het in al hierdie maande om te verseker dat die seekoeie en ook mense veilig kon wees nie.