Die toneel waar een voertuig op sy dak beland en ’n ander erg beskadig is, het motoriste laat dink dat daar verskeie ernstige beserings was.
Twee persone is met ligte beserings met ’n ambulans van die ongeluk af weggeneem.

Volgens die bestuurder van die Mercedes wat in die ongeluk betrokke was, was hy op pad om sy kinders by die skool af te laai.
Die bestuurder van ’n Fortuner het na bewering van Kanonkop se rigting opgery en ’n U-draai voor die Mercedes gemaak.

Met ouers wat op pad was om kinders by skole af te laai, was verkeer druk in die omgewing van Laerskool Middelburg wat erge verkeersprobleme veroorsaak het.

Verkeer is weggelei van Lilian Ngoyistraat af.