Me. Marilé Nieuwoudt, wat een van die koördineerders is van die operasiesentrum na die soektog, sê sy ken die omgewing goed vanwaar Willem Saterdag in die vroeë oggendure verdwyn het.

Sy meld dat die persone wat die rampartytjie die naweek by die lodge bygewoon het, Vrydag oor die laagwaterbruggie gery het oor die Vaalrivier. Die hoofingang na die lodge is oor dié bruggie. Daar is wel ook ’n alternatiewe roete na die lodge.

Me. Nieuwoudt sê dit is wel so dat die bruggie in die nag bedrieglik kan wees.

“Dit kan in die nag lyk asof jy reguit moet aanhou, maar daar is ’n skerp draai na links.”

Die aand wat Willem verdwyn het, het dit gereën en kon dit moontlik ook sig belemmer het.
Sedert sy verdwyning is alle inligting wat ingekom het, nagegaan.

“Ons het op elke roete die veiligheidskameras by die uitgange van boere se plase nagegaan. Dit is nie CCTV kameras nie, maar ’n tipe kamera wat net die voertuig en registrasienommer nagaan. As jy byvoorbeeld ’n wit Hilux bakkie, soos Willem se bakkie, soek met sy registrasienommer, dan kan die kameras aandui of hy daar verby is of nie.”

Hulle het nie net die roete via Bethal na Middelburg nagegaan nie, maar ook alle ander roetes vanaf die Lodge, maar nêrens wys sy voertuig nie.
Dit skep die idee dat hy nooit die lodge verlaat het nie.

Kameras het gewys dat hy by die lodge in is, maar nie weer uitgegaan het nie.

“Ons moet alle moontlikhede ondersoek en dit is hoekom die polisieduikers en helikopters gebruik word in die soektog in die rivier. Ons taak word egter bemoeilik met die Vaalrivier wat in vloed is. Dit is nie onmoontlik dat hy uitgery het by die lodge nie en ons sal steeds alle inligting wat ons kry, opvolg.”

•Meegaande foto’s: Henbase Lodge webtuiste.