’n Boodskap word geserkuleer dat die poort skoongemaak gaan word.

Die boodskap sê ook dat die veiligheidsborde, wat die bane moes verdeel, deur die nag platgery is en dat mense baie versigtig moet wees.

’n Trok, wat swael vervoer het, het in die poort omgeslaan en die hele vrag swael is in die poort gestort.

Gister het bekommerde motoriste laatmiddag laat weet dat die swael weer begin smeul het en is ’n video van die swaelrook gestuur.

Lees ook: Kranspoort ure gesluit na suurtrok omslaan, brand

Mnr. Rudolph Uys (brandbestrydingsoffisier) het gemeld dat mense nie hul vensters moet oopmaak as hulle daar verby ry nie, aangesien die rook skadelik is.

Hy wou die brandweer laat uitgaan om die smeulende swael te gaan natspuit, maar minute later het die natuur die probleem opgelos toe dit begin stortreën.

• Daar word gevra dat motoriste baie stadig deur die poort sal ry om die veiligheid van die skoonmaakspanne te verseker.