Terwyl hy stadig terugry vanaf Hendrina en sy oë die pad om hom bespied, vertel mnr. Deepraj Singh, dat hy Hendrina toe gery het met die hoop om Renier langs die pad te kry.

“Ek en Renier het op ’n tyd saamgewerk by Pentalin in eMalahleni en ek ken hom persoonlik,” sê mnr. Singh.

Hy het hom gistermiddag omstreeks 15:30 op die brug op die N11 (Hendrinapad) sien stap en langs hom gestop.

“Ek het vir hom gevra hoekom loop hy langs die pad, waarop hy gesê het hy moet 20km stap. Hy het gesê dat hy tot by die ou Kanhym se ingang sal stap en sal terugkom.”

Lees ook:

Vrou rasend van bekommernis nadat man verdwyn ‘op pad na veiling’

Mnr. Singh wou hom oplaai, maar hy wou niks weet nie en het net gesê hy is baie dors en dat hy water soek, waarop mnr. Singh vir hom ’n bottel water gegee en gery het.

“Hy het normaal gelyk en geklink,” sê mnr. Singh.

Eers later gisteraand het hy gehoor dat mnr. Van Niekerk se vrou, Michelle, na hom soek en dat ’n vermiste persoon saak by die polisie geopen is.

“Ek het vroeg vandag Hendrina toe gery, maar het tot nou toe niks gekry nie. Ek het gehoop hy het dalk onder ’n boom aan die slaap geraak en dat ek hom sou kry.”

•Die Middelburg Polisie het aangedui dat hulle ook met die Hendrina Polisie kontak sal maak om op die uitkyk te wees vir mnr. Van Niekerk.