Die vreemde vlieënde voorwerp wat Vrydagaand in die hemelruim opgemerk is, is tot sover as Gqeberha (Port Elizabeth) gesien!

Me. Retha Bain het die berig op die Middelburg Observer se webtuiste gesien en van hul ervaring vertel. Sy en ’n klomp vriende het ook die voorwerp gesien.

Hulle het op ’n plaas buite Gqeberha gebraai, toe sy ’n bewegende voorwerp net links van die ster Venus gewaar het.

Me. Bain het vir die ander partytjiegangers gesê, “Haai ouens, kyk daar is ’n satelliet!”

Lees ook: Vreemde vlieënde voorwerp dans in die lug

Die mans het vir haar gesê dat dit te vinnig beweeg vir ’n satelliet en dalk ’n vliegtuig kan wees.

“Maar toe maak hierdie voorwerp snaakse draaie en verdwyn dit net. Teen daai tyd was dit al ver regs van Venus, wat my laat besef het dat dit baie laag moes gevlieg het.”

• ’n Inwoner van Mineralia, me. Natasha du Toit, het ook die berig en die video onder oë gehad. Alhooewel sy dit nie Vrydagaand gesien het nie, het sy “dit al seker vier keer voorheen gesien!” Hulle het dit opgemerk as dit bewolk is.

• Persone wat nog videos, foto’s of staaltjies het van die vreemde vlieënde voorwerp in die lug, kan Daleen Naudé bel by 013 243 1434 of ’n e-pos stuur na daleen@mobserver.co.za. Enigiemand wat ’n logiese verduideliking kan gee vir wat dit moontlik kan wees, kan ook van hulle laat hoor.