Phillip, ’n rugbyspeler van Hoërskool Middelburg, het op 7 Maart ’n ernstige enkelbesering opgedoen, tydens ’n vriendskaplike rugbywedstryd teen Steelcrest High School.
Sy enkel is op vier plekke gebreek en al sy ligamente en spiere is afgeskeur.

Middies se versekering het die eerste paar dae die hospitaalkostes gedek en het ook die hekgelde vir die familie geskenk tydens die wedstryde van die NWU reeks teen Zwartkop.
’n Dans is ook by die Pure Plaas Boskamp Familieplaas aangebied om van die kostes te dek.

Hy is verlede Dinsdag in die Life Midmed Hospitaal geopereer.

Lees ook:

Rugbyspeler ernstig beseer

Sy ma, Mariëtte, sê daar is egter nog R50 000 uitstaande op die hospitaalrekening en dat hulle reëlings getref het om die res af te betaal.

“Dit is nie eers die kostes vir rehabilitasie nie, want hy sal op ’n stadium ook fisioterapie moet kry.”

Phillip is tuis en sê sy ma laggend sy weet nie hoe sy hom gaan kry om stil te sit nie.

“Die dokter het gesê hy mag eers na 10 weke vir die eerste keer op sy voet trap en dit is baie moeilik vir ons aktiewe plaasseun!”

Persone wat nog bydraes wil gee vir die ‘Phillip Nel Hulpfonds’ (rekening wat gestig is vir sy mediese uitgawes), kan me. Nel bel by 079 447 3081.

• Daar is ook ’n Facebookblad gestig, genaamd ‘Phillip Nel Fondsinsameling’ waar die bankbesonderhede van die fonds beskikbaar is en waar almal op hoogte gehou word van Phillip se herstel.