Bende steel motorfiets binne sekondes
Sekondes! Dit is al wat ’n sindikaat nodig het om motorfietse te steel.
’n Inwoner vra die gemeenskap nou om hom te help soek na sy 1200cc motorfiets wat vanoggend omstreeks 01:30 binne sekondes uit die motorhuis van sy ouerhuis in Steve Bikostraat, Dennesig, gesteel is.
Jason Cox het die GS 1200 BMW motorfiets al twee jaar, met die TrippleBlack 2013 model wat net sowat 10 000 kilometer op die odometer het.
CCTV beeldmateriaal wys hoe ’n wit Lowrider Hilux bakkie verby die huis, tot in Bullerlaan ry, waar dit stop.
Op dié stadium, is sowat ses boewe reeds besig om hul weg na die motorhuis in die erf te maak, waar hulle verskeie alarm-ogies omseil.
Die boewe is verby minstens vier ogies, waar hulle handeviervoet onderdeur gekruip het.
By die motorhuis het hulle ’n koevoet uitgepluk en die roldeure wat van binne af sluit, so gewelddadig oopgebreek, dat dele van die motorhuisraam uit die muur van die motorhuis gebreek is.
Die roldeur is met so impak oopforseer dat dele van die raam deur die motorhuis se plafon gebreek het.
Die oomblik toe die motorhuisdeur oopgebreek is, het die huisalarm afgegaan.
Die boewe was egter so vernuftig dat hulle die motorfiets se stuurstang, wat gesluit was, gebreek en binne vyf sekondes met die motorfiets uit die erf verdwyn het.
Die motorfiets is toe na die wagtende bakkie in Bullerlaan gestoot waarna die boewe die nag in verdwyn het.
Hulle was duidelik net agter die motorfiets aan.
Volgens mnr. Cox ry hy nie die fiets gereeld nie, maar glo dat hy tydens ’n rit die verkeerde oog gevang het.
Gedurende dieselfde tyd is daar ook ’n sleepwa uit ’n ander erf gesteel.
Die sleepwa, met registrasie CJ80853, is gedurende beurtkrag uit ’n erf in Lilian Ngoyistraat gegaps.
Veiligheidsgroepe is aan die gons want daar is ook by Oleanderstraat by ’n woning ingebreek gedurende die nag.
Mid-Alarms het die week gewaarsku dat kriminele aktiwiteite weer aan die toeneem is weens die komende feesseisoen, en sê veral besighede moet waaksaam wees.
Mnr. Cox vra dat enigiemand wat dalk die motorfiets gewaar, hom asseblief moet skakel by 076 675 7035.
@middelburgobserver Syndicate makes off with motorbike in seconds #crime #bike #bikers #motorcycle
