‘n Twaalfjarige dogtertjie met outisme moet vir die volgende paar weke antiretrovirale middels gebruik nadat sy gistermiddag in ‘n dwelmnaald getrap het in ‘n parkie.

“Dit was absoluut skokkend, ek het yskoud geword toe ek sien hoe die naald regop staan in haar toon!” het die ma (wie se naam weerhou word omdat die dogter minderjarig is) ontsteld gesê.

“Ek sien nou nog die dik naald voor my oë in haar toon. Die gemors van ons samelewing wat nie eers die naalde ten minste kan weggooi nie!”

Sy het ‘n aardige bedrag betaal vir bloedtoetse en moet medikasie gebruik word om seker te maak sy doen nie MIV (Menslike Immuniteitsgebreksvirus) op nie.

Wat vir haar die ergste is, is die vrees in haar kind se oë. “Sy bly sê sy hoop nie sy word siek nie. Dit was vir haar vreeslik erg!”

• Dit is die tweede voorval in ‘n maand waar ‘n dogtertjie in ‘n dwelmnaald trap. Vroeg in Oktober het ‘n negejarige dogtertjie ook in ‘n dwelmnaald getrap wat buite ‘n naskoolsentrum deur ‘n verslaafde neergesmyt is.

Die kind het verskeie bloedtoetse ondergaan en al die toetse was gelukkig tot nou toe nog negatief vir MIV en Hepatitis B.
Die ma het egter die gemeenskap gewaarsku teen die gevare en het gese dat almal hul deel moet bydra om dit veilig te maak vir almal in ons gemeenskap.