By Middelburg Hoërskool is sukses nie per toeval nie! Die Klas van 2025 het ’n 100% matriekslaagsyfer. ’n Prestasie wat getuig van volgehoue harde werk, dissipline en akademiese fokus.

Altesaam 265 leerders het die Nasionale Senior Sertifikaat-eksamen in November en Desember 2025 afgelê, met ’n algehele gemiddeld van 65,2%.

Die sterkste trappie op dié leer is sonder twyfel die 231 leerders (87%) wat vir Baccalaureusstudies aan universiteite van hul keuse gekwalifiseer het, terwyl 32 leerders toelating tot Diplomastudies aan ander tersiêre instellings ontvang het. Dit beteken dat die oorgrote meerderheid van die Klas van 2025 gereed is om hul akademiese reis verder voort te sit en berge te versit.

Die gehalte van die uitslae word verder beklemtoon deur die groot aantal hoë simbole wat behaal is, naamlik 351 A-simbole, 401 B-simbole en 435 C-simbole – ’n duidelike aanduiding dat hierdie sukses nie op geluk berus nie, máár op konsekwente konsentrasie oor ’n wye spektrum vakke.

Sedert 1918 bou Middelburg Hoërskool, graad na graad, aan jong mense se toekoms. Die matrieks van 2025 is die jongste bewys dat die skool se akademiese fondament steeds stewig staan.

Die skool bring hulde aan elke matrikulant wat ongeag struikelblokke, aanhou klim het, sowel as aan die opvoeders en ouers wat deurentyd langs elke leerder gestaan en ondersteun het.

Aan die Klas van 2025, jy het die berg se kruin bereik – sprei nou jou vlerke en vlieg hoog.