Die renoster kan nog gered word, die blesbok nie.
Hy het lankal uitgesterf.
Professionele rugby het hom die doodskoot gegee.
Daar was ’n tyd in Suid-Afrikaanse rugby waar elke provinsie ’n B-span gehad het.
Die Noord-Transvaal B-span van die jare 70 en 80, sou die meeste Curriebeker spanne van vandag geklop het.

Suidoos-Transvaal se B-span was bekend as die Blesbokke.
Daar was iets spesiaal aan hierdie span, miskien omdat spelers met uitsonderlike name soos Koffie van Staden, Pierewiet Ackerman, Kapokkie Erasmus, Ghitaar de Jager, Vlooi du Toit, Boerpens Strydom, Bakkies Lourens, Boertjie Barnard, Olaf Bergh, Mannetjies Bezuidenhout, China Vorster en Kleintjie Venter vir hulle gespeel het.

Kleintjie was ’n reus van ’n man. Dit was amper soos wanneer jy ’n olifant Tiny noem.
Kapokkie, Vlooi en China, het in 1980 vir ’n onvergeetlike oomblik op Loftus Versfeld gesorg.
Suidoos-Transvaal het daardie dag in die halfeindstryd van die Curriebeker teen Noord-Transvaal gespeel. Die Blesbokke was in die voorwedstryd in aksie.

Die meeste spelers was nie lus om ’n Noord-Transvaal B-span te pak, met die swaargewig bokser Kallie Knoetze en gereelde Noord-Transvaal Curriebeker spelers soos Edrich Krantz, Ewoud Malan, John Knox en Pierre van Zyl in hulle geledere nie.
Buitendien was die Suidoos seisoen verby en die Blesbok spelers was twee tot drie maande laas in aksie.

Die Vrydag is ’n span bymekaar geskraap. Gereelde tweede en derde span spelers Tonie van Tonder, Sieg Stander, Arrie Myburgh en Hannes Joubert, is gevra om die magtige Noord-Transvaal B-span aan te durf.
Knoetze het ’n slag bly lê en die groot skare het begin tel “een, twee, drie, vier, vyf…”. Met die telling op nege was die swaargewig op sy voete.

Na vyf minute was dit 6-0 in Noord-Transvaal B se guns, nadat Pieter Cronjé gedruk en Lourens de Jager, met die doelskop geslaag het. ’n Drie het vier punte getel.
Met 20 minute verstreke, was dit al 30-3 en die skare het gewag vir ’n slagting.
Maar toe skop Tjokkie teen Kapokkie vas, die witkop agsteman van Witbank, Tonie van Tonder, raap die bal op en druk onder die pale.

Die skare het gejuig.
Skielik was hulle bankvas agter die Blesbokke.
Elke beweging van die klomp Suidoosters is toegejuig.
Wanneer daar oor die luidsprekerstelsel aangekondig is Kapokkie lê aan pale toe, kon die gelag tot by die uniegebou gehoor word.

Die Blesbok het dalk ook gepronk

En wanneer Vlooi se naam genoem is, is daar verder gelag.
My China, mens kan amper sê dit was die dag toe Vlooi en Kapokkie, die Loftus skare in vervoering gehad het.
Die Blesbokke het steeds met 64-19 verloor.
Maar die Blesbok het dalk ook gepronk, want bekende Suidoos-Transvaal spelers Ben Badenhorst, Marius Bosman, Nan Broekman, Richard Cooke, Hendrik Crafford, Piet Craven wat kaptein was teen Noord-Transvaal B, Jan Erasmus, Roy Greybe, Chris Grobler, Gawie Hugo, Hendrik Koekemoer, Jorrie Jordaan, Hein Mentz, Terence Moll, George Minnaar, Daan Otto, Louis Pietersen, Hennie van der Spuy, Frank Sullivan en Bertus van Eeden, het vir die B-span gespeel.

Nuwe lewe

Net toe die Blesbok finaal in die vergetelheid verdwyn, het hy die afgelope tyd weer nuwe lewe gekry.
Dit het alles begin by ’n beriggie in die Middelburg Observer onder die opskrif “Die Blesbok gaan dalk herleef”.
Dit was nadat organiseerder Jakes van der Merwe jare gelede besluit het om oor nostalgiese redes Blesbok truie te maak en ’n Nashua uitnodigingspan tydens die jaarlikse sewes toernooi by Hoërskool Middelburg, daarin te laat speel.

Die berig het by Marius Noeth vasgesteek, wat vir Bethal, Elektrapark en Witbank, op voorry gesak en in 1989 vir die Blesbokke uitgedraf het..
Hy het begin om ’n lys van spelers saam te stel, wat vir die Blesbokke gespeel het en ’n Suidoos-Transvaal B-span Facebookblad begin.

So skaars soos hoendertande

Die belangstelling het ontplof.
Daar was net een probleem, Blesbok truie is so skaars soos hoendertande.
In die vroeë jare van amateur rugby was daar nie geld nie.
Dit was nie die rojale rugbylewe van vandag nie.
Na Blesbok wedstryde is die truie teruggeneem, laat was en weer gebruik.

Blesbok truie op bestelling

Suidoos-Transvaal sekretaris, Julius Weber, het seker gemaak dat van nommer 15 tot nommer een in die kleedkamer agterbly.
Daar was nie geld om nog truie te koop nie.
“As jy nie ’n trui gesteel het nie, het jy nie ’n trui gehad nie,” sê Gert Martin.
Hy het begin om Blesbok truie op bestelling te maak, omdat dit so gesog is.
Die rugbyversamelaar, Willem du Preez, sê hy het ’n Blesbok trui, maar daar is ook ’n Suidoos varkoor op die trui.

Geskiedenis nie opgeteken

Nog ’n probleem; die Blesbokke se geskiedenis is nie opgeteken nie.
Waar en wanneer is besluit om die naam Blesbok te gebruik?
Wie was die eerste Blesbok span.
Hoeveel wedstryde het hulle gespeel?
Wat was die tellings?

Suid-Afrikaanse rugby statikus, Eddie Grieb, het by navraag gesê dit is net Noeth wat inligting het.
Selfs in die boek oor Suidoos-Transvaal se geskiedenis, wat Grieb saam met Heinrich Schultze geskryf het, is daar nie interessanthede oor die Blesbokke nie.

Met die soeke na inligting is daar op nog ’n interessante stukkie inligting afgekom.
Die Puma professionele span, wat later in pienk gespeel het, was nie die eerste span wat die kleur pienk gebruik het nie.

Pienk varkoor

Martin sê die o/21 en o/23 Suidoos spanne van destyds het ’n pienk varkoor gehad.
Volgens hom is die versamelstuk wat Du Preez het ’n trui waarop sakwapens vasgewerk is.
Met die Blesbok wat skielik weer, danksy Noeth, gallop, is dit duidelik dat die trotse span van weleer, nog lank nie vergete is nie.
Ja, die blesbok is dalk dood, maar lank lewe die Blesbok…