Anri Groenewald en haar seun, Louis Groenewald of ‘Lewies’ soos Middelburg dié knaap ken, het lank gevoel asof hulle nét toedeure in die gesig staar.

Verwerping en isolasie is ’n harde realiteit vir outistiese kinders soos Lewies, maar Anri het nou ’n nuwe deur vir kinders soos hy, oopgeskop.

Lewies leef met vlak 3-outisme, en in die soeke na ’n plek waar hy aanvaar word, was die antwoord dikwels dat hy “té veel” is.

Vandag lyk dié prentjie egter anders danksy die bewusmakingsveldtog, For my Boy, wat intussen tot ’n nuwe klaskamer gelei het.

Outisme deur ‘n ma se lens

Anri se emosionele noodkreet en outisme-bewusmakingsveldtog op sosiale media het die gemeenskap geïnspireer.

Haar plasing is deur meer as 116 800 mense gesien, en danksy hierdie blootstelling, spog Kidz Coach Sentrum nou met ’n reënboogkamer vir kinders op die spektrum.

Sy verduidelik: “Elke toedeur het ons gesin op die regte tyd na die regte mense gelei.”

Middelburg se ‘Droomspan’

Die dorp se eie ‘droomspan’, bestaan uit ’n groep plaaslike kundiges, wat besluit het om gratis hulp aan te bied. Hierdie span bestaan uit Arbeidsterapeut, Danielle Humphris van Woudenberg; Spraakterapeut Eloise Moll; en Dr. Jacolien Greyling, ’n opvoedkundige sielkundige.

Meer as net ’n kamer

Die projek het onlangs ’n reusehupstoot gekry toe die ALZU-stigting ’n skenking van R45 000 gemaak het.

Die kamer word ingerig met sensoriese hulpmiddels en kalmtekokonne waar kinders kan afskakel.

Hoewel die projek reeds ’n verskil in twee maatjies se lewens maak, is die droom veel groter.

“Ons hoop om later sommer baie kinders op die spektrum ’n kans te gee,” sê Anri.

Wat aanvanklik soos ’n doodloopstraat gelyk het, was toe die begin van ’n pot goud aan die einde van die reënboog.