Na rekord neerslae in die somer is gedeeltes van plase steeds onbegaanbaar vir boere. Dit het veroorsaak dat voorbrande nog nie gemaak kon word nie.
Tradisioneel stel die Groter Middelburg Brand Beskermingsvereniging jaarliks die algehele brandverbod in op 1 Augustus. Dit bepaal onder andere dat die maak van oop vure verbode is, behalwe vir die voorbereiding van voedsel op areas spesiaal voorberei daarvoor soos in woonwaparke.
Voorbrande verder bemoeilik
Na die goeie reënval kan baie grondeienaars nog steeds nie by gedeeltes van hul plase uitkom met toerusting om voorbrande te maak nie. Dit beïnvloed die afkondiging van ’n brandverbod. Sekere areas het ook min tot geen ryp gekry nie, wat tot gevolg het dat brandmateriaal nog groen (nat) is wat die maak van voorbrande verder bemoeilik.
Versoek om daagliks aansoek te doen om brandpermitte
Daar is besluit om die afkondiging van ’n brandverbod te vertraag. Grondeienaars word versoek om daagliks aansoek te doen om brandpermitte tot ’n verbod afgekondig word. Permitte word daagliks uitgereik indien die Brand Gevaar Indeks gunstig is. Permitte word saam met die Indeks daagliks op WhatsApp-groepe geplaas, om monitering van brande te vergemaklik. Die Indeks word daagliks geformuleer aan die hand van verskeie voorspellings soos onder andere die Suid-Afrikaanse Weerdiens, Vital Weather, Windy en Hugo Weer.
Brandpermitte word uitgereik deur:
Helgaardt Muller 074 601 3753.
Rudolph Uys 082 308 7306.
Pieter Strydom 081 313 8365.
Jannie Ludeke 083 771 2161
Die bestuur van die Groter Middelburg Brand Beskermingsvereniging behou die reg voor om ter eniger tyd die algehele brandverbod af te kondig na gelang van veranderende weersomstandighede.
“Ons doen graag ’n beroep op alle grondeienaars om samewerking ten einde onnodige verliese te bekamp en alle brande te rapporteer en veiligheid van inwoners en werkers eerste te stel.”
- Inwoners het die afgelope week gekla nadat verskeie veldbrande dik rookwolke oor die dorp laat hang het. Jong seuns het gister die veld langs Dennesig aan die brand gesteek en vanoggend is die veld in Helen Jospehstraat aan die brand gesteek.
