’n Waterbok wat met kersliggies om die nek in Middelburg se industriële gebied af hardloop.
Dit kan mos nie waar wees nie?

Maar tog is dit die reine waarheid.
Drie weke later is die geheim van die waterbok egter nog nie opgelos nie.

Die persoon wat hom verdoof en na die Groblersdal distrik verskuif het, sê hy het nie ’n verklaring waar die bok vandaan kom nie en nog minder waar die kersliggies om sy nek vandaan kom nie. Hy verkies om anoniem te bly.

Mnr. Deon Cornelius van uBhetyan, wat al verskeie kere bobbejane op die dorp kom vang en hervestig het, sê as die bok nie van die Columbus omgewing kom nie, kon hy uit ’n wildsvoertuig ontsnap het wat op die dorp oornag het.

Dit is egter net raaiskote.
Maar vanwaar die kersliggies?

Die bok was duidelik nie mak nie en het na hy vrygelaat is, die bos ingevaar, waar hy intussen weer gesien is. Maar Middelburg het die laaste klompie jare soveel diere op die dorp gesien dat dit Noag se ark sou volmaak.

Die oggend toe ’n inwoner by die Middelburg Observer se redaksiekantoor inhardloop met die nuus dat daar drie seekoeie in die Klein Olifantsrivier is, het ons ook eers gedink dit is ’n Gert Grootlieg-storie.
Toe hy later uitasem met ’n video van die seekoeie opdaag, was dit die begin van ’n wekelange seekoei spoorvat.

Daar was al ’n likkewaan in die hospitaalgange, krokodilletjies in ’n Aerorand tuin en ’n vlakvark in ds Gawie Conradie se erf, maar ’n waterbok met kersliggies om die nek?
Sak Sarel, sou ons ook gesê het as ’n paneelkamera nie die waterbok in lewende lywe afgeneem het nie.
Wat is volgende?
’n Olifant in die ouetehuis?