Die vrou wat verlede week deur ’n mediese helikopter opgepik is op die R33-pad, nadat sy ’n koedoe getref het, het uit die hoërsorgeenheid vertel wat met haar gebeur het.

Me. Olga Mokoka-Ramagoma, die waarnemende stasiebestuurder van die Roossenekal staatsambulansdienste, het op 17 Oktober, ongeveer 7km voor Stoffberg ’n koedoe met haar voertuig getref.

Sy het ernstige beserings opgedoen en word sedertdien in die hoësorgeenheid van die Mediclinic in Polokwane behandel.

Me. Mokoka-Ramagoma, wat op pad was vanaf Roossenekal na Groblersdal, vertel dat daar drie koedoes oor die pad gehardloop het. Sy het uitgeswaai vir die een, genadiglik die tweede koedoe gemis, maar die derde koedoe met haar voertuig getref.

“Weens ’n borsbesering het ek nog probleme met my longe, maar die dokters is tans besig om daarna om te sien. Ek het ook my skouers en nek beseer.”

Volgens mnr. Derrick Maidment, 24 Seven Logistics, was nooddienste binne minute op die toneel het die helikopter 40 minute later geland vanaf Polokwane en haar hospitaal toe geneem.

Mnr. Maidment vertel dat dit onduidelik is of die koekoe die ongeluk oorleef het, aangesien die bok nie op die toneel was toe nooddienste by die toneel opgedaag het nie.
“Die koedoe kon óf oorleef het en weggehardloop het, óf iemand het die koedoe langs die pad opgetel. Ons het net die koedoe se bloed en hare op die toneel gevind.”

Lees ook: Vrou met helikopter opgepik ná sy koedoe tref