Harde klapgeluide wat soos geweerskote geklink het, het WhatsApp-groepe Sondagaand laat gons.

Inwoners van Groblersdal het gesê dat die geluide soos geweerskote geklink het, terwyl ander gesê het dit het eerder soos bomvuurwerke geklink.

Ander, wat nader aan die klank was, het gesê dit het geklink ‘soos ’n OTM-masjien wat gebom word.’

Dié boodskappe het sedert 19:38 begin instroom.

Daar is vinnig vasgestel dat die harde geluide wat gehoor is, ’n vragmotor was, wat se bande gebars het as gevolg van te veel hitte op sy remdromme. Drie bande het as gevolg daarvan gebars en die remdromme het aan die brand geslaan.
Die voorval het naby die kruising by Sasko in Wesstraat plaasgevind.

Noodpersoneel, bestaande uit 24 Seven Logistics, Gunmar, Brandweer, Loskop Alarms en Supreme Auto Body Towing was vinnig op die toneel.
Die pad is afgesper terwyl brandweer die vragmotor geblus het.

Niemand is in die voorval beseer nie en die vragmotor is van die toneel verwyder.

• Omstreeks 21:03 was die toneel opgeruim en die pad weer oop vir verkeer.