Die soektog na die 74-jarige Ernst Steynberg, ’n boer van Rysmierbult in Noordwes wat sedert Sondag (26 Julie) vermis was, het vanoggend (28 Julie) tragies geëindig nadat sy liggaam gevind is. 

Die familie se predikant, ds. Thinus Roux, het sy dood aan Potchefstroom Herald bevestig. 

Steynberg het Sondagmiddag spoorloos van sy plaas, Rietvallei, verdwyn, waarna ’n grootskaalse soektog van stapel gestuur is. 

Boere en hul werkers, Working on Fire-spanne, die polisie se honde-eenheid en talle gemeenskapslede het die afgelope twee dae onverpoos na hom gesoek. 

Volgens sy vrou, Alise, is Ernst omstreeks 16:15 Sondagmiddag vir die laaste keer in die kombuis gesien waar hy gereed gemaak het om na ‘n lughawe toe te ry. 

“Ek het hom teen 16:30 begin soek, maar hy was nêrens te vind nie. Hy het nie gery nie; al sy voertuie en sleutels was nog daar, al sy besittings. Hy het geen identifikasie by hom gehad nie,” het sy vroeër gesê. 

Steynberg was ten tyde van sy verdwyning in ’n swart sweetpakbroek en ‘n donkergrys top geklee. 

Die familie het hulle opregte dank uitgespreek teenoor almal wat by die soektog betrokke was, asook die gemeenskap vir hulle gebede, ondersteuning en hulp gedurende dié moeilike tyd. 

In dié stadium is die omstandighede rondom sy dood nog onbekend. 

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.