Die liggaam van die 74-jarige Ernst Steynberg, wat sedert Sondag, 26 Julie vermis was, is Dinsdagoggend gevind.

Ds. Tinus Roux, die familie se predikant, het aan die Potchefstroom Herald bevestig dat Ernst se liggaam gevind is.

In hierdie stadium is daar nog geen verdere besonderhede oor die omstandighede rondom die voorval bekend gemaak nie.

Steynberg het Sondagmiddag spoorloos van sy plaas, Rietvallei naby Rysmierbult, verdwyn, waarna ‘n grootskaalse soektog van stapel gestuur is. Boere en hul werkers, Working on Fire-spanne, die polisie se honde-eenheid en talle gemeenskapslede het Maandag en Dinsdag onverpoos na hom gesoek.

Die familie het hul opregte dank uitgespreek teenoor almal wat by die soektog betrokke was, asook die gemeenskap wat hulle met gebede, ondersteuning en hulp bygestaan het gedurende die moeilike tyd.

Die Herald betuig sy innige meegevoel aan Ernst se familie en geliefdes.