Die Volkie-gemeenskap is in rou gedompel nadat Hugo Nolte, ’n Graad 11-leerder van Hoër Volkskool Potchefstroom, gisteraand (16 Oktober) in ’n tragiese motorfietsongeluk buite Potchefstroom dood is.

Die ongeluk het gisteraand op die Viljoenskroon-pad, sowat 3 km buite Potchefstroom, tussen ’n bakkie en ’n motorfiets plaasgevind, berig die Potchefstroom Herald.

ER24 en Mooirivier Beskerming se mediese personeel is na die toneel ontbied. Volgens inligting is een persoon lig beseer, terwyl Nolte op die toneel aan sy beserings beswyk het.

Die nuus van sy skielike dood het groot hartseer by Hoër Volkskool en onder diegene wat hom geken en liefgehad het, gelaat.

Die skool het sy medelye met Nolte se familie, vriende en almal wat deur sy dood geraak is, uitgespreek.

“Met groot hartseer en skok deel ons mee dat Hugo Nolte, een van ons Graad 11-leerders, gisteraand tragies in ’n motorfietsongeluk oorlede is,” lui die skool se boodskap.

“Ons innige meegevoel gaan uit na die Nolte-familie, Hugo se vriende en almal wat hom geken en liefgehad het. Mag julle troos, krag en vrede vind in die dae wat voorlê.

“Ons dra julle op in ons gebede.”

Die skool het hul boodskap afgesluit met die woorde uit Psalm 34:19: “Die Here is naby die gebrokenes van hart, en Hy verlos die wat verslae is van gees.”

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.