Haar ouers hou haar hand vas en klou aan hul geloof terwyl hul 10-jarige dogter, Danè Greyling, steeds nie selfstandig kan asemhaal of haar onderlyf beweeg nie, berig die Vaalweekblad.

Dané is een van vyf leerlinge wat ernstige beserings  in die ongeluk op 8 Oktober opgedoen.

Drie van haar skoolmaats Amandla Buthelezi (7), haar boetie Lwazi Buthelezi (9) en Uriel Govender (6) het in die ongeluk gesterf. Die bestuurder van die bussie Johan ‘Zet’ Oosthuizen (60), een van die gemeenskap se geliefde pastore, het ook sy lewe in die ongeluk verloor.

Die botsing het op die R57, naby die R59-brug tussen Sasolburg en Vaalpark, plaasgevind.

Danè se pa, Dandrè Greyling, het vroeër die week aangedui dat Dané se longe steeds nie sterk genoeg is om selfstandig asem te haal nie. ’n Trageostomie is Maandag in haar keel geplaas, en ’n voedingsbuis is deur haar neus ingesit.

Die buise is nou uit haar mond, wat haar gemakliker maak. Sy sal na verwagting sowat twee dae lank slaperig wees terwyl die wond van die trageostomie genees en dokters seker maak dat dit nie bloei nie.

Die mediese span se aandag sal daarna weer op haar ruggraatoperasie en herstel fokus. Die skroewe en penne in haar rug sal bly, het die dokters aan haar ouers gesê. Haar nekbesering was gering en het nie stabilisering vereis nie.

Volgens haar pa lyk dit of haar brein goed funksioneer. Wanneer Danè wakker is, antwoord sy ja of nee deur haar kop te skud. Sy beduie ook na voorwerpe om te vra wat dit is en wink haar ouers nader.

Sy kan egter nie praat nie weens die trageostomie. Danè kan haar bolyf beweeg, maar het tans geen beweging in haar onderlyf nie weens die rugmurgbesering. Daar is steeds vloeistof in die onderste deel van haar longe, en sy het ’n longinfeksie waarvoor sy behandel word.

Sy het ook ’n ultraklank- en CT-skandering ondergaan om ’n probleem met haar blaas te ondersoek. Die uitslae is nog nie beskikbaar nie. Haar linkerbeen, wat gebreek is en met penne gestabiliseer is, genees volgens haar pa goed.

Dandrè sê die gesin hou vas aan hul geloof terwyl hulle die onseker pad vorentoe probeer hanteer. “Ons hou net aan Jesus vas en vertrou dat Hy haar sal genees, want enigiets is moontlik by Hom.

“Maar ons weet ook nie hoe haar genesing vir haar en ons gesin sal lyk nie. Laat God se wil geskied. Ons harte is seer en ons voel hulpeloos,” het hy gesê.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.