Grootskaalse soektog na verdagtes ná OTM-ontploffing op Vrystaatse dorp

Vyf verdagtes is steeds op vrye voet ná ’n skietgeveg in Koppies waarin een verdagte dood en ’n ander gewond is.

’n Verdagte is doodgeskiet en ’n tweede is gewond tydens ’n skietgeveg met die polisie nadat sewe verdagtes in die vroeë oggendure (November 18) ’n OTM in Koppies, Vrystaat, met plofstof opgeblaas het.

Volgens die plaaslike polisiewoordvoerder luitenant-kolonel Thabo Covane het die sewe verdagtes omstreeks 01:30 die OTM in Kerkstraat met plofstof opgeblaas, berig die Parys Gazette.

Hulle het aanvanklik te voet van die toneel gevlug voordat hulle in twee voertuie, ’n wit Audi en ’n Volkswagen Polo met vals nommerplate, weggekom het.

Covane sê die voertuie is in die rigting van Zamdela op die R82 opgemerk. Die polisie het ’n uitkyk vir die voertuie gegee en lede van die Fezile Dabi-distrik se Operasionele Bevelsentrum ontplooi om die roete na Koppies te patrolleer.

Ongeveer 10 km buite Zamdela het die polisiebeamptes ’n silwer Volkswagen Polo opgemerk wat uit die teenoorgestelde rigting aangery gekom het.

Die beamptes het omgedraai, waarna die Polo langs die pad stilgehou het en twee mans uit die voertuig geklim het.

Toe hulle die polisievoertuig opmerk, het een van die mans op die beamptes begin skiet. ’n Skietgeveg het uitgebreek waarin een verdagte doodgeskiet en ’n tweede gewond is, het Covane bevestig.

Die verdagte wat dood is, is in ’n veld aangetref met ’n pistool langs hom. Die gewonde verdagte is langs die pad gevind. ’n Sak met geld waarop daar bloed was, asook plofstof, is langs hom aangetref.

Die polisie het op ’n vuurwapen, plofstof en ’n onbekende bedrag geld beslag gelê.

Die polisievoertuig is deur koeëls beskadig en een van sy bande is ook beskadig. Geen polisiebeamptes is in die skietgeveg beseer nie.

Twee sake geopen

Die polisie het twee strafsake geopen.

Die Koppies-polisie ondersoek die OTM-ontploffing ingevolge artikel 27(1) van die Wet op Plofstof 26 van 1956, asook die diefstal van geld uit die OTM.

’n Tweede saak is by die Zamdela-polisie geopen na aanleiding van die skietgeveg. Die aanklagte sluit in die besit van plofstof, die besit van vermoedelik gesteelde eiendom, die besit van ’n ongelisensieerde vuurwapen en ammunisie, asook poging tot moord.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.

Read original story on www.citizen.co.za

At Caxton, every story is written by humans. We use AI only to perform quality checks - never to generate the news. Happy reading!

Support local journalism

Add The Citizen as a preferred source to see more from Network News in Google News and Top Stories.

Liezl Scheepers

Liezl Scheepers is editor of the Parys Gazette, a local community newspaper distributed in the towns of Parys, Vredefort and Viljoenskroon. As an experienced community journalist in all fields for the past 30 years, she has a passion for her community, and has been actively involved in several community outreach projects as part of Parys Gazette's team.
Back to top button