Die 73-jarige Robbert Joubert het gister (5 Januarie) weer in absentia voor die Potchefstroom-landdroshof verskyn op aanklag van die dubbele moord op die broers Deon en Johnathan Fourie, direkteure van die Chubby Chick-onderneming, berig Parys Gazette.

Joubert se volgende hofverskyningsdatum is 30 Januarie, het polisiewoordvoerder kol. Adele Myburgh bevestig.

Agtergrond van die Chubby Chick-skietery

Deon het op 14 Desember aan sy wonde beswyk, net meer as ‘n maand ná die skietvoorval in die onderneming se raadsaal waartydens sy broer, Johnathan, noodlottig gewond is.

Deon was sedert die skietvoorval op 10 November in ‘n Johannesburgse hospitaal waar hy verskeie operasies ondergaan het.

Hofsaak uitgestel vir mediese redes

Joubert is in beide arms gewond toe sekuriteitspersoneel op die skietvoorval gereageer het. Hy word steeds in die Potchefstroomse provinsiale hospitaal onder bewaking gehou.

Weens die erns van sy beserings, het hy sedert die skietvoorval nog nie in persoon in die hof verskyn nie.

Geen verbintenis tussen beskuldigde en onderneming

Chubby Chick het vroeër in ‘n verklaring benadruk dat Joubert geen verbintenis met die besigheid het nie, en nie ‘n werknemer, oud-werknemer of kontrakteur was nie. Volgens die verklaring is ’n vergadering tussen die broers en die beskuldigde gehou, vermoedelik oor ’n eiendomstransaksie.

Deon en Johnathan is ongeveer 30 minute ná die vergadering geskiet.

Deon was op daardie stadium steeds in die raadsaal toe hy verskeie kere geskiet is. Hy het om hulp geroep, waarna Johnathan onmiddellik gereageer het en toe ook verskeie kere geskiet is.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.