Die Krugersdorp-gemeenskap het saamgekom om die lewe van Rikus Kylander (18), ’n oud-leerder van Hoërskool Noordheuwel, tydens ‘n pragtige seremonie te vier.

Rikus het op 18 Desember tydens ’n snorkelavontuur in Mosambiek verdwyn. Soektogte het 22 dae lank voortgeduur en is op 10 Januarie gestaak.

Krugersdorp News berig dat daar ‘n groot opkoms was om die familie te ondersteun.

Ds Braam Smith het Rikus as iemand met ’n kleurvolle persoonlikheid beskryf en gesê dat hy lig in ander se lewens gebring het.

Rikus se wiskunde-onderwyseres, Marietjie Muller, het herinneringe gedeel oor sy maniere, werksetiek en deursettingsvermoë. Sy het vertel hoe hy, ondanks ’n eerste toets van 85%, ontevrede was en daarna nooit minder as 94% behaal het nie en uiteindelik ook die vaktoekenning gewen het.

“Hy was een van daardie mense wat, wanneer hy by jou verbystap, jou in die oë kyk en beleefd groet,” het sy gesê.

Vriende het genoem dat Rikus mense laat voel het asof hulle spesiaal is, en hom as ’n ‘engel’ en ’n ‘one of one’ beskryf.

Familievriend Jaco Botma het sy ouers en sussie bedank vir hul rol in sy lewe en ’n brief van die familie voorgelees waarin almal vir hul ondersteuning en gebede bedank is.

Die skool het bevestig dat die familie tans nie met die pers wil praat nie.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.