Willem Kruger se bakkie se GPS-koördinate wys dat die voertuig die area naby die kroeg verlaat het en na die waterrand van die Vaalrivier gery het, waar dit gebly het tot die sein doodgegaan het.

Dit is volgens kenners ’n aanduiding dat die bakkie onder die water beland het.

Barry Bateman, die woordvoerder van Afriforum se Privaatvervolgingseenheid, het gister bevestig dat hulle ondersoekspan in besit is van die GPS-koördinate, wat deur die voertuigopsporingsmaatskappy verskaf is, wat die bewegings van Kruger se bakkie daardie oggend van sy verdwyning (13 November 2022) aandui.

“Dit vorm deel van die objektiewe feite wat die eenheid tot sy gevolgtrekking laat kom het.”

Die verklaring wat Bateman gestuur het noem dat die uitslae egter weens die swak sein nie so akkuraat is as wat dit kan wees nie.

“Ons wil ’n kenner na die toneel neem en met ’n behoorlike buite-GPS-opsporingstoestel die bewegings tot op ’n punt stipuleer.”

Hy het verder gesê dat dit dan in die dossier ingesluit sal word om die aanklaer of landdros te help met die neem van ’n besluit.

•  Willem het in die vroeë oggendure van 13 November 2022 verdwyn tydens ’n rampartytjie van Ghini Greyling by die Henbase Lodge.
• Gevorderde toerusting is gebruik om die Vaalrivier, wat op daardie stadium in vloed was, te deursoek. Sy bakkie, met Kruger se liggaam nog daarin, is nege dae later gevind.
• Daar was die naweek ’n berig in die Sondagkoerant, Rapport, dat daar op vier selfone beslag gelê is van gaste wat by die rampartytjie was maar die SAPD wou dit nie bevestig of ontken nie.