Die geskiedkundige 1919 hangbrug oor die Vaalrivier in Parys is onveilig.

Die Ngwathe Plaaslike Munisipaliteit het in ‘n dringende kennisgewing wat vandag uitgereik is, inwoners van Parys en besoekers gewaarsku dat een van die kabels van die historiese brug gebreek het en die brug daarom nie veilig is nie.

Vir mense se eie veiligheid en die veligheid van ander is gevra dat daar onder geen omstandighede nou op die brug geklim of geloop moet word nie, en om aktiwiteite naby die brug te vermy tot verdere kennisgewing. Versperringsband is ook by die  brug aangebring om mense te waarsku teen die gevaar.

Die munisipaliteit sê verder dat inspeksie en herstel van die brug hoë prioriteit geniet om te verseker dat dit weer veilig sal wees vir die publiek. Die brug sal egter gesluit bly totdat herstelwerk gedoen is en die brug weer veilig verklaar is.

Intussen is mense se samewerking om die waarskuwing te gehoorsaam van uiterste belang.

Veral ouers is dringend gevra om seker te maak dat kinders nie naby die brug gaan nie, en ook nie in die rivier by die brug te swem wat hul lewens sodoende in gevaar kan stel nie.