Polisieduikers het vroeg vanoggend begin met die soektog na die insittendes van ‘n bakkie wat vermoedelik Saterdagaand reeds deur vloedwater van ‘n laagwaterbrug buite Heilbron op die S281 meegesleur is. Van die insittendes was klaarblyklik ook kinders is verneem.

Die polisie is vanoggend in kennis gestel toe die voertuig in die water gesien is.

Die voertuig is intussen uit die water gehaal, en word daar nog gesoek na van die insittendes.

Dit het heelnag in Heilbron gereën en is daar Saterdag ook gewaarsku oor water wat oor die R57 tussen Petrus Steyn en Heilbron gestroom het.

Die weerdiens het gewaarsku teen swaar reën, wind en hael wat vir vandag oor die suidwestelike deel van Mpumalanga en die verre oostelike dele van die Vrystaat provinsie verwag word.

Motoriste moet ook baie versigtig wees vir slaggate op die R59 tussen Parys en Sasolburg. Daar is verlede week begin met die herstel van van die gate en was ‘n stop/ry-punt opgestel.