Judie se spore lê diep by Vrystaatse Voortrekkers
Baie Voortrekkers sal Judie Coetsee onthou vir haar omgeehart en betrokkenheid by die Voortrekkers oor baie jare.
Judie Coetsee se liefde vir kinders het uit haar gestraal. Sy was vir jare kommandoleier by die Parys Voortrekkerkommando, waar haar omgee hart ‘n stempel op baie kinderlewens afgedruk het. Sy het ook op die gebiedsbestuur van die Vrystaatse Voortrekkers gedien as oordleier van Oord Riemland.
Wille Engebrecht, leier van die Voortrekkers in die Vrystaat, het namens die Voortrekkerbeweging gesê dat daar met hartseer van haar dood kennis geneem is, en dat baie Voortrekkers tannie Judie sal onthou van kampe by die Voortrekkers se Doornkloof-kampterrein.
Judie is op 11 Junie in die ouderdom van 79 jaar by die Najaarsrus Tuiste vir Bejaardes oorlede waar sy die afgelope twee maande versorg is.
Die begrafnisdiens is op 17 Junie uit die NG gemeente Parys-Oos gehou.
Judie het op ‘n plaas by Nelspruit by haar ouma grootgeword, nadat sy beide haar ouers op 11-jarige ouderdom ná n motorongeluk verloor het.
Sy bekwaam haarself as onderwyseres en begin skoolhou in Germiston. Daar ontmoet sy vir Fanie, ‘n apteker van beroep, en trek die jong egpaar in die laat sewentigerjare na Parys waar Fanie Stefano Apteek in Middelstraat begin. Sy het vir jare in die apteek gehelp, en later ook in Taljaard Apteek gewerk.
Sy het die grootste deel van haar lewe in Parys gebly.
Vir haar kinders en kleinkinders was sy ‘n toonbeeld van liefde – ‘n ma en ouma wat altyd daar was.
Die laaste twee maande het sy met haar gesondheid gesukkel, vertel haar dogter Christine, en was sy in en uit die hospitaal.
Sy sal met net die mooiste herinneringe deur haar kinders, Fanie en Christine, kleinkinders, broer, Gert en suster, Leonie, jarelange vriendin, Daleen, en elkeen met wie sy die pad gestap het, onthou word.
