Polisie by Tierpoort in die Mangaung Metro soek dringend inligting van padgebruikers wat kan help met die ondersoek na ’n tref-en-trapongeluk wat op die N1-hoofweg naby die blou liggingmerkerbord N1 – 15 13.OS plaasgevind het.

Volgens  luitenant-kolonel Thabo Covane het die Tierpoort  Frontline Service op 6 Februarie omstreeks 22:00 ’n oproep van die 10111-sentrum oor die ongeluk ontvang, waarna ’n patrollievoertuig na die toneel ontplooi is.

Met  hul aankoms is menslike oorskot en ‘n oranje hemp op die toneel gekry, maar was daar geen motorvoertuig in sig op die toneel nie. Die Tierpoort-polisiestasie ondersoek nou ‘n saak van strafbare manslag.

Enige lid van die publiek met inligting oor die ongeluk word gevra om speurder-adjudant-offisier Molebogeng Bosman te kontak by 071 675 9500 of 051 411 2782. Alternatiewelik kan inligting via die MySAPS-toepassing deurgegee word of skakel die SAPD se  Stop Misdaadnommer 08600 10111.