Drie beamptes van die Suid-Afrikaanse Polisiediens (SAPD) verbonde aan die Pretoria-Wes Polisiestasie het in die Pretoria-Noord Landdroshof verskyn op aanklagte van korrupsie ter waarde van R10 000 en afpersing. Die beskuldigdes, konstabel Lionel Macoba (25), sersant Vincent Messiah Ndhlovu (44) en sersant Peaceful Evgenate Mnisi (38), is elk borgtog van R5 000 toegestaan.

Daar word beweer dat die drie beskuldigdes ’n saak ondersoek het wat twee beamptes van die Tshwane Metropolisiedepartement betrek het wat van ontvoering en afpersing verdink word.

Na bewering het die beskuldigdes op 5 Mei met een van die klaers by ’n winkelsentrum vergader. Tydens die vergadering het die klaer sy kollega gekontak, wat ook by die ontvoering- en afpersingsaak betrek is. Daar word beweer dat die drie beskuldigdes R50 000 van die klaers geëis het in ruil daarvoor dat hulle nie gearresteer word nie.

Die volgende dag het die klaers met lede van die Suid-Afrikaanse Munisipale Werkersunie (SAMWU) vergader en die beweerde voorval verduidelik. Hulle is aangeraai om verder met die beskuldigdes in gesprek te tree. Later dieselfde dag het een van die klaers sy prokureur ingelig, wat die saak by die SAPD se Teenkorrupsie-eenheid aangemeld het.

Op 8 Mei het die klaers glo ’n oproep van die beskuldigdes ontvang waarin ’n vergadering by die Pretoria-Wes Polisiestasie versoek is. Tydens die vergadering het die klaers onderhandel dat die bedrag van R50 000 tot R30 000 verminder word, en ’n ooreenkoms is glo bereik.

‘n Week later het lede van die Teenkorrupsie-eenheid ’n lokvaloperasie uitgevoer. Die klaers het, vergesel van polisiebeamptes, na ’n restaurant in Montana gegaan waar hulle die beskuldigdes ontmoet het. Daar word beweer dat ’n bedrag van R10 000 aan die beskuldigdes oorhandig is voordat hulle op die toneel gearresteer is.

Die staat het nie borgtog teengestaan nie, omdat die beskuldigdes nie as vlugrisiko’s beskou is nie.