Van die lekkerste hoender tot biltong, beesskenkel, tamatiebredie met kluitjies, skaapskenkel en wildsvleis het Saterdag op ‘n ry in die potte staan en prut by die Wes-gemeente se basaar, waar almal kom deel het in die lekker saamkuier en weglê aan koningskos wat hier gemaak is.

Vroegoggend al was daar nie plek vir ‘n muis om nog te parkeer nie, want in die kerksaal kon jy jou mandjie volmaak met alles wat lekker is.

Op die kerkterrein het ervare jukskeispelers reggestaan om groentjies te leer hoe om die skeie te gooi, maar dit was die 13 potjies op ‘n ry wat jou laat sit het vir ‘n basaarkuier soos lanklaas gesien.

Nie minder nie as R7 500 se pryse was in totaal op die spel vir die wenpotjies, en wyn geborg deur Boschkloof het gesorg vir ‘n tikkie ekstra finesse vir die dag. Uiteindelik was dit Derick en Polla Claassen wie se hoenderpot die beoordelaars se smaaksintuie oortuig het vir ‘n wen. Charles en Collet Barnard was die naaswenners, met Theo Dunn en Kobus Calitz se Loftus-stalletjie wat met die derde plek weggestap het.

Ses pryse is in totaal weggegee, terwyl kaartjies vir die fynproewerpotjies verkoop is sodat basaargangers kon smul aan die lekkerte.