Die plaaslike DBV se hulp is weer verlede week deur Nood Mediese Dienste ingeroep nadat ‘n taxi ’n perd op die Parys/Koppies-pad naby die Schonkenville woonbuurt, raakgery het.
Insp. Maggie Singh het die beseerde perd in die veld langs die pad met kopbeserings en ’n ernstige beenfraktuur aangetref.
Die hulp van ’n plaaslike veearts is gekry, maar die perd moes weens die erns van sy beserings van sy lyding verlos word.
Niemand in die taxi is na wat verneem is, beseer nie.
Die eienaar van die perd het tot nou toe nog nie na vore gekom nie. Die DBV sê egter dat rondloperdiere soos hierdie ’n ernstige gevaar vir motoriste inhou.
In nog ‘n voorval op 8 Augustus, is die DBV se hulp die aand om 18:30 ingeroep vir ’n vulletjie by ‘n hostel naby die Tumahole taxi-staanplek.
Die vulletjie is die oggend omstreeks 05:00 gebore, maar kon nie aan die merrie drink nie. Hy was baie swak en is deur die DBV na die veearts geneem, waar hy deurnag gevoed en gemonitor is.
Hy was egter té swak en is die volgende oggend dood. Ook in dié geval kon die vulletjie se eienaar nie opgespoor word nie.
Gazette het verlede week berig van ‘n geval waar die DBV tot die redding moes kom van twee perde wat met kettings om hul nekke vasgebind was en sonder kos en water gelos is.
