Die langverwagte veiling van onder meer twee luukse motors wat voorheen as ampsmotors vir die Ngwathe munisipaliteit gebruik is, sou Woensdag, 8 Junie by die munisipale magasyn gehou word.
Onder die motors wat onder die hamer moes kom was ‘n luukse Mercedes Benz ML en Audi Q7, sowel as die brandweer se noodreaksievoertuig wat vroeër ernstig in ‘n sekondêre botsing op die N1 beskadig is.
Die Mercedes was vroeër jare die ampsmotor van Ngwathe se burgemeester, maar is ná ongelukskade wat swak herstel is, met ‘n nuwe ampsmotor vervang. Sedertdien het die ou ampsmotor vir baie lank ongebruik en nutteloos, tesame met ‘n luukse laatmodel Audi-motor wat vroeër deur Ngwathe se speaker gebruik is, by die brandweerstasie gestaan
Ngwathe se hoof finansiële beampte, mnr. Lebusa, het in Maart vanjaar by navraag van Gazette bevestig dat die motors voor 30 Junie vanjaar opgeveil sal word.
Daar is al in Desember 2020 besluit om van oorbodige munisipale roerende bates wat naas dié voertuie, ook meubels, rekenaars en toerusting insluit, ontslae te raak met ‘n veiling wat op ‘n ope en deursigtige wyse gehou moet word. ‘n Afslaer moes toe aangestel word om die veiling te finaliseer, en is die proses vir die aanstel van Auction24 op 6 Mei verlede jaar afgehandel, het Lebusa bevestig.
In die lig van die beperkings van die Covid-19 pandemie moes die veiling egter uitgestel word.
Ngwathe se uitvoerende burgemeester, rdl. Victoria de Beer, het Maandag teen Gazette se druktyd bevestig dat die veiling Woensdag gehou sou word.