Dié gemors is oor die naweek by Parys se 1919-hangbrug afgelaai. Vraag is – wie moet nou dié gemors wegvat?
Net Vrydag nog is hier voor die aanvang van die naweek skoongemaak en duisende spandeer om vloedskade aan die oewerwal te herstel. Alles uit eie sak deur ‘n handjievol vywilligers om hier skoon, netjies en instand te hou, want ‘n skoon dorp trek nie net toeriste na die dorp om ons plaaslike sakelui te help nie. Dit sê iets van die dorp se karakter.
Moenie jou gemors iemand anders se probleem maak nie. Jou gemors – jou verantwoordelikheid.
Munisipale vullisverwydering in Parys word gereeld gedoen, of betaal iemand om jou rommel wat jy wil laat verwyder na die stortingsterrein te neem as jy nie self kans sien om dit daarheen te vat nie.
Dit gebeur al meer dat mense hulle skuldig maak aan onwettige vullisstorting met huis en tuinvullis, en selfs bourommel wat op sypaadjies, parke en selfs langs die rivieroewer gestort word. Ook die dorp se vleiland en die nywerheidsgebied loop gereeld deur onder skaamtelose morsjorse.
Vullissakke word selfs in asblikke langs die rivieroewer gedruk,
Help ons om die dorp skoon te hou en bring jou kant.
Deur net jou eie sypaadjie skoon te hou en jou eie vullis op te tel, kan elke inwoner alreeds ‘n groot bydrae lewer.
* Dankie aan Annette van Biljon wat op eie onkoste die gemors weggery het. Dit word waardeer.
