Balle het Saterdag gerol vir Vrystaat Versorging in Aksie (VVA ) Parys se eerste rolbaldag waar 14 spanne mekaar op die plaaslike rolbalklub se bane die stryd kom aansê het. Die dag was nie net vir ervare spelers nie, en het agt groentjie spanne gesoute spelers kom uitdaag.

Groentjies wys wie is baas

Die groentjies het gewys wie baas is met die amateur Oud-maar-nie-koud-span wat met die louere weggestap het. Nog ‘n amateur span, Peaky Blinders, was tweede, met die span van Toets van der Westhuizen in die derde plek. Die VVA-span het die spit afgebyt as verloorders.

Na die prysuitdeling het Peaky Blinders gevoel hulle verdien eintlik die eerste plek, en het die Oud-maar–nie-koud span uitgedaag vir nog ‘n rondte se spel. Nie eens die reën kon die geesdriftige jongmense en spangees blus nie, en het hul tot die einde deurgedring met Peaky Blinders as algehele wenners.

VVA sê dankie

VVA sê dankie aan Mica, Spur, Jimmy Jaggers, Krokedil, Bosboer en Willow Acres vir die borg van die pryse. Spesiale dank aan Amanda en Jaco van Parys-rolbalklub vir die hulp met reëlings vir die dag en die gebruik van Parys-rolbalklub se fasiliteite.

Ná die sukses van die dag, word ‘n rolbaldag ten bate van VVA ook vir 2026 beplan, maar wees gewaarsku – kompetisie gaan straf wees.