Die bekende en veelsydige akteur en sanger Matt Stern, is vroeër vandag in die ouderdom van 54 jaar aan sy hart oorlede.

Hy was veral bekend vir sy rol as onder meer Dominee Dou Droel van die komedie Huis Lelieveld, en was in verskeie verhoogproduksies te sien, sowel as plaaslike en internasionale produksies.

In  2002 het sy loopbaan ‘n hupstoot gekry toe hy die sluipjagter Kurt Conradie in die sepie 7de Laan vertolk het. Daarna is hy in verskeie ander rolle gesien. Van sy filmwerk sluit in “Racing Stripes”, “District 9” en Hond se Dinges en Stoute Boudjies.

Hy was ook ‘n professionele sanger, opgelei in musiekteater as tenoor. Sy repertoir het gewissel van Elvis tot opera, en was hy naas akteur en sanger, ook bedrewe met oorklankingswerk en ‘n tweetalige en vaardige seremoniemeester.

Inwoners van die Najaarsrus Tehuis vir Bejaardes in Parys het in 2021 en 2022 die voorreg gehad om hom te kon hoor toe hy by die tehuis ten bate van die plaaslike Solidariteit Helpende Hand-tak opgetree het.