Plofstof in motor by padblokkade gekry
Die drie mans wat gearresteer is het reeds voor die Stilfonteinse landdroshof verskyn.
‘n Plofstofdeskundige moes Vrydag 12 Desember na ‘n roetine-padblokkade op die N12 tussen Stilfontein en Klerksdorp ontbied word, nadat plofstof versteek in ‘n motor gekry is wat tydens die padblokkade deur polisiebeamptes deursoek is.
Die plofstof wat 150 skokbuis-ontstekersamestellings, nagenoeg 40 elektriese skokbuis-inisieerders en vyf blaaspatrone ingesluit het, is deur die plofstofdeskundige veilig verpak en verseël.
Die padblokkade was deel van die polisie se Operasie Shanela 2.
Drie mans tussen die ouderdomme van 41 en 48 jaar, is by die padblokkade in hegtenis geneem op aanklag van die onwettige besit van plofstof en het Maandag hul eerste hofverskyning voor die Stilfonteinse landdroshof gehad.
Die waarnemende provinsiale kommissaris, majoor-generaal (dr.) Ryno Naidoo, het die span se waaksaamheid geloof en gesê dat die polisie sal voortgaan om alles in hul vermoë te doen om ’n veiliger feesseisoen te verseker.
