Die polisie het ‘n ernstige beroep op die publiek gedoen om te help soek na die familie van ‘n onbekende man wie se liggaam n die Vaalrivier op ‘n plot by Wonderfontein, Sasolburg, gekry is.

Polisiewoordvoerder sers. Josephine Rani sê ‘n verbyganger het die liggaam van die man in die rivier opgemerk op Donderdag 16 November, en die polisie in kennis gestel.

Die ouderdom van die man word tussen 70 en 75 jaar geskat. Hy het ‘n blou oorpak baadjie, swart broek, rooi T-hemp en ‘n bruin moulose trui gedra. Een van die man se pinkies is geamputeer. Hy het ‘n korterrige baard en het twee silwer oorringe gedra.