‘n Bejaarde vrou van 83 is vanoggend, Dinsdag 16 April, in haar huis in Parys deur ‘n tuinhulp aangeval en beroof.
Volgens polisiewoordvoerder kapt Lorraine Earle het die vrou die man vanoggend in haar erf ingelaat om vir hom werk te gee. Sy het haarself in die huis toegesluit terwyl hy in die tuin gewerk het.
Om ongeveer 10:00 het die man gevra vir toiletpapier, en het sy oopgesluit om dit vir hom te gee.
Die man het haar toe oorval en aangerand. Sy is nie ernstig beseer nie.
Die verdagte het te voet gevlug met geld en die slagoffer se selfoon.
Hy is klein van postuur en het ‘n bruin baadjie aangehad met ‘n langbroek en netjiese skoene.
Enigeen met inligting wat die polisie kan help in hul ondersoek, is gevra om die speurhoof, kapt. Gert Bruwer te skakel by 082 466 8090, of die Stop Misdaadnommer by 08600 10111.
