Uitspraak oor intervensie later verwag
Die burgerregteorganisasie het versoek dat hy toegelaat word om onder meer met die administrasie van die water- en rioolwerke te help.
‘n Dringende aansoek is verlede week deur AfriForum by die Bloemfonteinse Hooggeregshof ingedien waarin intervensie by die Ngwathe Plaaslike Munisipaliteit ingevolge artikel 139 van die Grondwet versoek is. Hiervolgens kan ‘n provinsiale uitvoerende gesag intree en ‘n munisipaliteit onder administrasie plaas. Uitspraak word in Januarie verwag.
Die burgerregte organisasie het Dinsdag in ‘n verklaring gesê inwoners van Parys is vuisvoos gesukkel met gebrekkige dienslewering wat meer onlangs daartoe gelei het dat hulle tydens ‘n hittegolf sonder krag of water gelaat is. AfriForum sê verder dat wanneer daar wel water was, was dit bruin en ongeskik vir menslike gebruik
Die organisasie het Dinsdag ‘n klagte oor dié en ander menseregteskendings by die Menseregtekommissie (MRK) ingedien.
Volgens Alta Pretorius, Distrikskoördineerder vir die Mooirivier-streek, bied AfriForum gereeld sy hulp aan vir die munisipaliteit.
Schalk Burger, voorsitter van die AfriForum-tak in Parys, sê verder die bestuur het ‘n goeie verhouding met die munisipaliteit gehad tot op hierdie punt. Hy sê egter AfriForum se insette word geïgnoreer.
AfriForum voer in sy hofaansoek aan dat die munisipaliteit volgens die organisasie versuim om sy administrasie, begroting en beplanningsprosesse behoorlik te struktureer en te bestuur en as gevolg daarvan nie volhoubare dienste aan die gemeenskap kan lewer nie.
Daarom het die burgerregteorganisasie versoek dat hy toegelaat word om onder meer met die administrasie van die water- en rioolwerke te help.
