Nagenoeg 1 300 mense het vanjaar die gewilde Deo Gloria-kerskonsert onder leiding van Marli Krüger en Erna Rademan bygewoon wat by die NG Kerk Vredefort gehou is.

Vanjaar was die eerste keer dat die konsert oor twee dae aangebied is om die groot hoeveelheid mense van oral oor wat die konsert tweejaarliks bywoon, te kon akkommodeer.

Daar word nou reeds beplan aan die program vir die volgende konsert om weer ‘n luisterryke verskeidenheid te kan aanbied, sê Erna. Onder vanjaar se gaskunstenaars was Johan Botes (orrel), Marguerite van Wyk (sopraan), Renier Holtshauzen (trompet) en die Bochabelo String orkes.

Die samesang van honderde stemme saam met die orrel en orkes was weer soos vorige jare ‘n hoogtepunt.

Die eerste konsert is in 1998 gehou, en het die Deo Gloria-koor oor jare gegroei tot ongeveer 60 lede wat die volle spektrum van die gemeenskap verteenwoordig – van jonk tot ervare – en van professionele beroepslui tot afgetrede koorentoesiaste.