Die gebreekte spanningskabel by Parys se geskiedkundige hangbrug oor die Vaalrivier kan reggemaak word. Dit is die mening van Kevin Wood, ‘n strukturele ingenieur, wat Vrydag die brug saam met Mike Fourie, van die Parys Golf & Country Estate, en Johan Swart van AfriForum besoek het, om die skade by die brug te evalueer.

Wood het ook bevestig dat die kabel gebreek het as gevolg van verwering oor die jare. Die skade is in Desember gesien. Die loopvlak van die brug is sedertdien gesluit ter wille van veiligheid. Omdat die spanningskabel in die sementstruktuur aan die dorp se kant van die brug gebreek het, sal ‘n volledige evaluering van die skade, en die toestand van die kabels aan beide kante van die brug nou gedoen moet word, om ‘n aksieplan en kosteberaming te kan doen.

Die inisiatief om kundiges in die private sektor te betrek vir advies oor die herstel van die kabel, is danksy vrywilligers van die 1919 Hangbrug-groep wat ‘n jaar gelede die brug se draadwerk aan weerskante van die loopvlak herstel het, die brug en omgewing verfraai het en steeds instand hou. Die hangbrug is een van Parys se grootste toerisme trekpleisters waarby die hele toerismebedryf in die dorp baat.

“Daarom is die plan om die plaaslike toerismebedryf en die Erfenisstigting te nader vir befondsing om die kabel te herstel,” het Fourie gesê. Mense kan ook ‘n elektroniese bydrae maak vir die herstel van die brug in die volgende rekening: 1919 Brug, FNB, takkode: 250137, rekeningnommer: 63069763895.