Vir die afgelope 24 jaar is hierdie ‘n bekende gesig wat jy in Parys sal sien wanneer die NG gemeente Parys-Oos sy jaarlikse stofie-draf agter die jaffelpanne afsluit met die gebruiklike pretstap.

Dit alles ten bate van die Bybelgenootskap van Suid-Afrika, want elke jaffel wat verkoop word, en elke tree wat geloop word met die projek help om ‘n Bybel bekostigbaar in die handel beskikbaar te kan stel.

Na jare is die Bybel steeds een van die mees geleesde boeke.

Vroegoggend het eers die fietsryers weggespring, en daarna die stappers. ‘n Vinnige vroegoggend stappie om ‘n verskil te kon maak, tesame met die 7 045 jaffels wat die gemeente vanjaar gebak het met die hulp van sowat 70 vrywilligers.